Budak Kumpeh Asli

   Mari lebih dekat dan mengenal siapa saya :)

Tak kenal maka tak sayang tak sayang maka tak cinta kato orang macam tuh yoh..

Namo kulo : Bunga mercy wely

Sayo lahir dengan selamat di dusun : Sipin teluk duren pado tanggal 10 agustus 1996

Tepat nyo 20 tahun yang lalu.(lah tuo kulo koo)

Asli orang kumpeh ulu, jambi

Tinggi badan : 150cm (pendek sayo ni semekot kato orang jambi tuh)

Berat badan cuman : 37kg ukuran pinggang budak sd. Mangkoe galak baibo ati kalu waktu kerjo maseh d kato budak magang  tapi awet mudo jugo di buat e yoh dak jok :D

Lah berusaha ndak gemukin badan tapi dak gemukgemuk jugo padahal makan banyak lah apo ado abes.. cacingan tapo hedak jok.

Begayut tiap pagi dak pulo tinggi eh lah jadi nasib awak samacam koo..

Patut di syukuri be..

Orang lain banyak jugo kecik dari awak (ngenak i perasoan dewek)

Awak koo apolah e cantik dak manis dak eder dak jugo :D  

Jadilah kalu ndak mawak kondangan dak malumalui amat.

Awak tuh orang e mudah akrab dengan orang lain mungkin karno awak hobby ngoceh jadi ado be bahan omongan dak pake abes... tapi  harus kenal dulu soal e entah ngapo awak koo payah nian ndak negur orang duluan. Di kato kan gengsi dak pulak lah jok.

Awak alhamdulillah lah punyo cowok .. untuk saat koo... budak e tuh tinggi nan jok e 170'n beda 20cm dgn awak.. bayangkan lah kalu awak bjalan dengan diok semacam mawak adek :D

 Tapi biasoe awak pake selop tinggi tuh hah bejalan dengan diok. Tapeletok tapeletok lah kaki situ dari pada jadi bahan perhatian orang..

Kasian jugo diok kagi malu tapo diok jalan dengan awak. Tapi kato orang tuh cinta menerimo apo ado e tapi kalu maseh biso di usaha kan tinggi dak nyerah lah.. walau pun kecik kemungkinan soal e lah ndak masok 20 tahun paktor keturunan jugo dk tek e yang tinggi.

Awak tuh paling senang kalu di sekolah dulu belajar bahasa inggris soal e ebat be menurut awak lidah tepeletok pas maco e..

Kalu masalah musik gegalo jenis musik awak suko.. apolagi sekarang era dangdut hedak..

Asoii di geboy coyy....

Hahaha

Selerah humor awak koo tinggi.

Tapi awak padek merajuk ... dak boleh tatenggil dikit kato orang tuh tapi dengat cuman sudah tuh elok dewek lah.

Keras kepala mungkin lah setengah dari diri awak.. tekak di kuduk..dak telap di peretuk kan :D

Cemburuan curigaan tuh sifat dak elok selanjut e. Tapi kini lah belajar dewasa dak marahmarah dak jelas lagii...

Kalu jadi kawan awak koo baik lah dengan kantikanti tuh kalu mintak bantuan awak bantu lah...

Kalu minjam doet awak pinjam kan lah tapi yoh kalu lah dak dapat awak pecayo awak segan bekanti lagi dengan budak tuh.

Kalu ndak nganing kan cerito masak kecik awak sarintu matan ebat ee beladasan main adang garis tuh hah. Bola tepuk. Loncat tali. Yang awak hobby kan t main sembunyian awak agak curang dikit . Awak sembunyi dalam kamar dewek naik k rumah jadi budak tuh payah ndak nyari awak .. 

Lagu e ebat main sembunyian tuh.. macam koo aningkan yoh.

"Gotri ala gotri naga sari ri ri rokok samsul sol sol dari jawo siapo menjadi kodok"

Asooii di geboy coy.. haha

Entah siapo lah pencifta e lagu tuh yang jelas dari jaman mak awak sarintu sampe jaman awak lagu tuh dak pernah bganti.. .. 

Lagu keramat :D

Tapi miris oy e jaman kinitu budak kecik e dak semacam jaman awak dulu lagi mano ndak lah main bmasak'n tuh main gotri tadi t bola tepuk dan lainlain .. budak kini sebok main coc. pokok e tangan e dak lepas dari hp.

Ingat nian e waktu awak masih kecik dulu hp ko termasuk barang langkah.. orang bduit be yang punyo. . Nenggok e be jarang apo lagi ndak nyentuh ee... kini lah macam jadi bahan konsumsi .

awak koo orang e beduit idak .. mah (papi) cuma kerjo jadi aparat desa biaso .. mak (mami) bekebon kunyit cuman. Adek kandung ado 2. Cowok galoe awak anak pertamo. Agak sak esoh dikit jadi yang paling tuo koo gegalo beban agak berat k awak.

Kemas permadi (adik keduo) beny plasa (adik ketigo)

.

Ngomong-ngomong masalah kumpeh..

Kalu awak galak ngerayau ke jambi t nanyo asli mano.

Pas sebot kumpeh... eh orang t malah nyebutt jauh lah.. ado yang sinis be mandang ado jugo ngato gena kubu muang anakb:@ baseng ndak benar lah e.

Padahal cuman sejam'n sampe lah ke jambi orang kota tuh galak lebay.

Sakit nian atii e di kato kubu.

Masalah sinyal memang agak payah di siko tenggelam timbul mangko awak jarang nulis blog.

Tapi awak hobby jugo fb'n

Ko hah namo fb awag jok.

: Bunga mercy wely

: Bunga willy

: Bunga barca

Banyak orang bilang kalu namo awak tuh elok padahal orang kumpeh.. emang orang kumpeh dak boleh punyo namo elok :/ galak meringam orang kota tuh.

Yang awak segani lagi kalu orang kumpeh kerjo di jambi.

Awak tuh punyo kawan diok kerjo di jambi betemu lah dengan awak. Subhanalah cakap e lah make aku aku biaso e awak.

Sudah tuh pas diok balek kampung awak tegur lah macam koo percakap'n e.

Awak : ado kau balek jok. . Kapan?

Kawan awak : iya kemarin sore aku pulang nya besok udah ke jambi lagi kok.

 :o mak ee nelan aek liur awak nganing e sambil ngulingnguling dalam kurungan jamban.. bengal isi perut. . Dak lagi lah e negur e baru jugo beberapo bulan di jambi. . .

Tentang masakan.. awak paling suko makan lauk tempoyak :D lauk sambal ikan teri rebus pucuk ubi lalap pete sambal jengkol . Hahaha ...

Enak nian cobo lah kalu dk pecayo cuman mambu e be nyenggat jadi harus sikat gigi atau dak makan permen yo jok kalu ndak cobo kalu dak tuh pas kalian becakap dengan orang ado duo kemungkinan orang tuh purapura lari atau pingsan. Haha...

Ado kawan awak tuh pas balek ke dusun dak doyan lagi lauk macam tadi ngomong e lah hobby lauk di kfc tuh hah yang gambar orang tuo tuh .. eh lantak situ lah... sok sok'n amat.

Kumpeh tuh terkenal dengan duku duren e jok kalu lagi musim bejaya galoo masyarakat e...

Main main lah ke kumpeh jangan takut jauh takut litak kumpeh tu luas . Kumpeh gena kubu idak cuman galak melonggoh be kalu nenggok orang asing :D 

Tapi budak kumpeh tu baik baik .

"Kecik-kecik seluang pempen

Idak pernah mudik ke jambi

Kecik-kecik budak sipin

Idak pernah ingkar janji"

Itu lah pantun dari kulo yang asal e dari desa sipin koo... banyak banyak bekelakar biak dak cepat tuo . Hidup koo di nikmati be buang yang masam mambu keringat tuh bawak santai .  Jangan ndak galau kato orang kinitu.

Jangan ndak pikir kan amat serba dak dayo tuh...

:D

Sudah lah yoh litak tangan awak ngetik e koo.. esok lah kito becerito pulak. Awak ndak mandi lah lamo dak mandi koo terakhir mandi pagi tadi kinitu lah sore. Awak ndak jugo ke elokelok'n tapi dak macam cabecabe'n :D

sesedang be :p 

bagi yang dak paham dengan cakap awak silah kan minta terjemahan dari budak asli kumpeh atau jambi medok.

Kalu dak paham jugo esok lah awak buat kan kamus bahasa kumpeh.

Ingat kumpeh bukan kubu baru nyampeh tapi kito samobe kami jugo gaul macam budak kota walau pun kito beda keramaian .